Kúndelikti ómirde tutynatyn taýarlarymyz ben bizge kórsetiletin túrli qyzmetterdiń sapasyna kóńilimiz tolmaı jatatyn tustar jıi kezdesedi. Kóp jaǵdaıda eki jaqty kelisilgen kelisimsharttar aıaq asty bolyp, óz quqymyzdy tıisti deńgeıde bilmegendikten kúrmeýi kóp kúrdeli máselelerge tap bolyp jatatynymyz da jasyryn emes. Tutynýshylar Odaǵynyń negizgi mindeti azamattardyń quqyqtyq saýattylyǵyn arttyryp, olardy zań sheńberinde qorǵaý. Máselen, qandaı da bir taýar satyp alyp onyń sapasyna kóńilińiz tolmasa, ıakı, sizge kórsetilgen qyzmettiń sapasyna qatysty narazylyǵyńyz bolsa, Tutynýshylar Odaǵyna tirkelip, óz talap-tilekterińizdi jetkize alasyz. Iаǵnı, «Tutynýshylardyń Ulttyq Odaǵy» AQU qyzmetiniń negizgi baǵyttarynyń biri azamattardy taýardyń qasıetteri men sapasy, jumystar men kórsetiletin qyzmetter jaıynda tolyqqandy aqparattandyrý. Uıym mamandarynyń aıtýynsha elimizdegi saýda-sattyqqa qatysty qyzmet sapasyna qoıylatyn talaptardy ár azamat búge-shúgesine deıin bilýge tıis. Máselen, Eýropa elderinde bul qatań saqtalady. О́ıtken jaǵdaıda taýar men qyzmet sapasynyń básekege qabilettiligi arta túspek. Tutynýshylardyń quqyǵyn qorǵaý suraqtary boıynsha el Úkimetiniń birinshi májilisi 2017 jyldyń 4 shildesinde ótken bolatyn. Ol jerde Tutynýshylardyń Ulttyq Odaǵyna eń jıi qoıylatyn suraqtar kóterilgen edi.
– Úkimet májilisiniń nátıjesi boıynsha TUO-ǵa hat joldanǵan bolatyn, ol hatta kóterilgen negizgi máseleler mynalar: tekseris nátıjesinde 39,8% balalar oıynshyqtary qaýipsizdik standarttaryna sáıkes emes, uıaly baılanystyń sapasy jáne quraldardyń negizsiz esepten shyǵarylýy, oqý partalarynyń qaýipsizdikke baılanysty suraqtary, tutynýshylardyń quqyǵyn qorǵaý týraly qoǵamdyq keńes qurý máseleleri aıtylǵan. О́kinishke qaraı, bul suraqtardyń eshbirine mardymdy nátıje shyqpaı otyr. О́z otbasynyń densaýlyǵyna nemquraıly qaramaıtyn ár azamat óziniń ne tutynyp júrgenin, jep júrgen taǵamynyń quramyn, sapasyn, zııany men paıdasyn bilýge mindetti. Biz tutynýshylardyń talǵamy turǵysynan, taýardyń fızıka-hımııalyq kórsetkishterin, sonymen qatar iri sýpermarkettermen usynylatyn satý jetekshileri jaıly aqparatty zertteımiz, dám tatý jáne tutynýshy saýalnamalaryn júrgizemiz. Tutynýshylardyń quqyǵyn buzatyn ókilderdiń jaýapkershiligin arttyrý, aryzdyń baǵasy kóleminde daýdy sheshý, bas tartqanyna erikti túrde aldyn ala aıyppul qarastyrý, tutynýshynyń densaýlyǵy men ómirine zııan keltirgeni úshin aryzdyń baǵasynyń 5 ese kólemindegi aıyppul salý sııaqty máselelerdi kóterip otyrmyz. Sebebi, azamattardyń sapaly ómiri – qoǵamdy alǵa jeteleıdi – deıdi «Tutynýshylardyń Ulttyq Odaǵy» AQU Prezıdenti Svetlana Romanovskaıa.
Zańgerler men uıym ókilderi kúndelikti ómirde ár adam Tutynýshylardyń quqyǵyn qorǵaý salasynda Qazaqstan Respýblıkasynyń normatıvtik-quqyqtyq bazasyndaǵy jańalyqtardan udaıy habardar bolyp otyrýy kerektigin aıtady. Sonda ǵana tutyný naryǵyndaǵy sapaly jáne qaýipsiz taýarlardy, qyzmetterdi paıdalanýǵa mol múmkindik ashylady. Osylaısha, ár qoǵam múshesi tutynýshylar, kásipkerler men memleket arasynda órkenıetti qarym-qatynastyń qurylýyna septigin tıgizer edi.
Arman OKTIаBR,
«Egemen Qazaqstan»
ALMATY
